COPAS (HEARTS) - EPILOGUE

COPAS (HEARTS)
.
EPILOGUE
.
Thantei_LauraSean
.
H & E
.
THLA RUK HNUAH*
.
"I harh em?" a kut tetakte vawt zet chuan ka nghawng arawn dek a, ka muhil ka harhchiang teh e. Inlet thawkin a kawngah ka kuah a, a lo inring lo bawk nen te thatin a nui zui ar ar a. Ka bawhbet zui deuh hmiah A sam la hnawng deuh atang chuan a inbualna a la rei lo tih a hriat mai. A rimtui chek chek bawk. Ka hnuaia mu chungin min rawn melh chho a, a la nui sang.
.
Ka naka min tham thut chuan ka eu zawk. A sirah let thlain kan nui dun a, nghet takin a kawngah ka la kuah ta reng a. Hetiang baka zingkar hun hman dan nuam hi a awm theih ka ring lo.
"Kaihthawh i har theih dan em em hi mak ka ti.." insiam rem sat satin a tho a, rem zet hian ka dulah a thu auh a. Thil tuar hreawm tak a ni hran lo.
.
A mitmeng fiah zet chuan min en chhukin a kut chuan ka hmai arawn khawih dan dan a, a hmui pet sawi deuhin a nui sak sak bawk.
.
"Hmelthat leh lutuk hi a hreawm em?" ka chhan hmain ama tawngkam hman vang chuan za zet hian dak deuh chungin a nui a.
Ka kut phar chhuakin a nghawngah ka vuan a, keichu ka nuih a za ve lo. Min fakna tawngkamte hi mi dang tana ho tak a lo ni a nih pawhin ka tan chuan thu hriat nuam ber ber leh ka hriat nin ngai miah loh tur an ni. Nitin hian ka hmangaih zual a, ka thlahlel em em reng bawk. Ani pawh keimah ang tho a ni. Ka nui lo tih min hmuh chuan a nui reh riai riai a.
.
"Hmel tha tihte chu lawm hle ta che." ka biangah min fawpin a thu kang leh a, biang chauh chu ka duhtawk lo nasa. Ka nupui duhtak chu ka fawh theih turin ka kuai kun leh a.
.
"Chaw ei kan peih tawh e.." kan nula lo ang lang lang a hriat chuan inla hrangin thawh mai a tum a, ka la vuanbet leh rih.
.
Kan inneih khan ka inah lut lovin kan in pui, ka nu leh pa chenna ah kan lut a, tun thlengin kan la awm ta reng a ni. Kum khat tal an bula cheng tura ka nu leh pa min duhna chu tihhlawhtlin nge ka duh bawk. Muffin pawhin min hnial lo. Ka rin aiin ka nu leh pa ka chhungte pawh a kawmngeih thiam a, ka lawm em em. An zavai hian an ngaina tih ka hria a, amah ai ai hian nuam ka lo ti zawk thin.
.
"I ril a tam tawh lo mi? Tho rawh.. Papa.."
Min koh dan vang chuan ka phu deuh zawk. Tim leh deuh hmel a pu. Hetiang hian min la ko ngai miah lo. Zawhna zawt mitmengin ka en a, ka en dan chu hrethiamin a bu nghat.
.
Thu chhuakin ka malchungah ka pawm a, ka kuah vawng vawng a. Ani pawhin ka nghawngah a ban pahnihin min kuah ve bawk. Sawitur ka hre mai lo. Keihi pa ka ni ve tawh dawn. Ka hmangaih ber pum chhungah hian kan fa tur a awm anih chu! Min lawmpui rawh u..
.
"Min fawp rawh.." ka tih chuan ka hmuiah min fawp zauh a, a inla hrang leh vat.
.
"Tho tawh ang le." ka malchung atanga chhukin khum sirah a ding a, chet  mai nachang pawh ka la hre lo. Thu chungin ka la en reng.
.
"Ka hruai ang che. Vawiin ah doctor va hmu ang aw?" bu nghat in min rawn hnaih leh a, ka vawn turin a ban pahnih arawn phar chhuak a. Hmm..ka thawh mai loh chuan. Thil lawmawm takin min hmuak alawm le.
.
Tukthuan kan eikham chuan muangchang deuha insiamin kan chhuak dun a. Amah dek lo va awm har ka ti. Heihi chu thil mak a ni hran lo. Khawlaia vawn a duh miah loh hian runluih a nuam lehzual thin bawk a.
.
Kan doctor kan nghah lai chuan min rawn nghawk zeuh a, a enna lama ka hawi chuan Loretta ka hmu hlawl. Naute a pawm a, min rawn hmuh chuan a ding chawt a. A lo kalna lama let leh tum niawm tak hian a hawilet zawk zawk mai. Min hmuh a chak lo hle tih a lang reng bawk. Naute a lo nei tawh tih kan lo hre miah lo.
.
Ka thutna atang chuan dingin Loretta chu ka pan a, a hmel hamhaih lutuk chu a khawngaihthlak zawk. Nau a pai lai khan enkawl ngai khawpin a dinhmun a tha lo kha a nia, tha taka naute a nei thei chu a lawmpuiawm khawp mai. Muffin chu ka bulah a lo kal ve zel tih pawh ka lo hre lo.
.
"I dam tha maw? Kan inhmu khat hle mai."
ka tih chuan "Dam tha e. Enge intih dawn?" a tibah deuh nawk nawk. Loretta naute pawm chu ka en zawk a, Sawmzuala a an zia ka hmuh chuan ka thinlung chhung hi a che dawt. Ka thiantha ber ni a ka lo chhal thin, min phatsan a a duhzawng a tih theih nana min hmangtu pawh ni se ka thinlungah hian ka thian a nih thinna kha ka nuai bo thei lo. A fa chu ka lainat em em bawk tih ka pha lo ve.
.
"Ka lo pawm thei angem?" ka tih chuan phawk lehzual hian min en a, ka lo nui thung. Zei fahran lo hian Sawmzuala fa chu ka pawm a, a hmel chu ka en vang vang a.
.
"In inentir dawn anih ka ring. Engtik nge__?" Loretta chuan Muffin a en a, a zawhna awmzia hriain Muffin chuan a lo chhang thuai a.
.
"Tukin khan kan hre ve chauh a. I naute chu a hmeltha hle mai."
.
"Ka lawm e. Hetianga min biak duh pawh hi ka ring lo va. Hlim reng ang che u.." a hnuk a ulh teuh tih a awm atang chuan a hriat reng mai.
.
Loretta chuan a naute chu ka kut atanga la in min kalsan a, Muffin nen chuan kan enzui reng a. Muffin chuan ka kutah arawn vuan a, a hmel ka lo en vat.
.
"Naute kha ka khawngaih.."
.
"Tha takin a lo seilian ve mai ang." tiin ka chhang naa ka rilru tak chuan Sawmzuala fapa khan a pa a hmu ve ngai dawn lo tih ka ngaihtuah thleng vek tho. A lainatawm tak zet. Duhthlanna hman dik loh vanga tuartu chu engmah tihsual neilo kha naute kha a ni.
.
"Hmingthansangi.."
.
"I hming an lam tawh a nia. Ka lo lut ve dawn em?" ka tih chuan a bu nghat a.
.
.
"Tunah kar 2-na a hmang  mek anih hi. Uluk takin inenkawl ang che. Naupai lai hian ei in fimkhur a tul nasa a nia."
Muffin en chuan in enin kan nui a, kan tang ru teuh ve ve bawk. A vawikhatna a ni bawk a, a hlimawmin a zamawm em em bawk anih hi. Awm dan tur pawh thiam a har.
.
Damdawi eitur doctor in min ziahsak chu leiin in ah kan haw tlang a, in kan thlen chuan ka nu chuan a lo hrethiam tlat nia. Nu te hriatna ril zia hi amak ka ti thin.
.
"Engtin nge i hriat?" tia ka zawh chuan "Nu ka nia lawm." tih zawngin min chhang.
.
Nilengin in ah kan awm a, eng eng emaw kan tih chhungin khua a thim der mai. Muffin naupai thu chu zanriah kil lai laiin ka nu'n a sawi chhuak a, kan vai rik ta hluai a ni ber e.
Nupui ka neih hnu hian zan lamah ka chhuak meuh lo a, ka chhungte chauh ni lo kei ngei pawh hian mak ka inti fo mai chu anih hi. Ka duh ber ka bulah a awm tawh a, mahni chauha chhuah chhan tur hi a tam ta vak lo.
.
Dar 9 a rik chuan mutchhuah em em vang pawh ni lovin kan room-ah ka chho a, khuma thu awn duai chungin tv ka en a. Ka mutthilh lai ka hre miah lo.
.
Thawm ri sat sat ka hriat chuan ka phu chhuak deuh zawk. Muffin chu ka bulah thu awn vein eng emaw ei mial mial chung hian tv a en a, ka harh tih a hre miah lo.
.
"Enge i ei a?"
"I duh ve mi?" min en chuang miah lovin a thil ei lai chu a ei zawm a, ka nui tawp. A thil ken ka laksak chuan min en ve ta chauh a.
.
"Hetiang thil zanreia ei chu a tha dawn mi?" ka tih chuan arawn ban a
"A tui alawm.. Ka ei laklawh a nia."
.
"I ei duh ngai miah loh kha.."
"Khawi.."
Ka pek leh chuan a ei leh nghal mial mial. A awm dan chu a hmuhnawm khawp mai. A hnungah thuin ka mal inkarah ka thuttir a, ngawirengin a show enlai chu kan en zawm a. Rei vaklo hnuah Muffin chu insiamrem in tui zet hian a muhil ta siai siai a. Tihharh hlau taka siamremin puan ka sin tira, a bulah mu in reiloteah ka muhil ve nghal mai bawk.
.
.
"Eleazer.. Eleazer..." min sawi det det a, chiang lo ruaiin ka harh a. Muffin na tuar hmel ka hmuh chuan ka thu chhuak nghal thuai.
.
"Ka pum ana.. Chuan__ thisen a chhuak in ka hria.." ni lo..ni lo..
.
"Damdawiin a kal nghal angai anih chu." ka tho thuai a, thawmhnaw ha sawk sawkin Muffin chu kan room atangin ka pawm chhuak a. A thlanfim a tla bawrh bawrh mai. Naute a chhiat dawn a ni mai thei. Ka ngaihtuahna ringawt pawh chuan min ti hlauthawng zual.
.
Ka nu leh pa leh ka u te nupa an lo tho ve bawk a, hmanhmawh takin damdawiin kan pan nghal a.
.
Pawna ka nu nen Muffin kan nghah chhung chu rei tak a ni. Sana ka en a, minute 15 chiah a la ral. Minute 15 rei ber a va ni chiang em! Doctor a lo chhuah chuan ka lo pan thuai a.
.
"Enge a an? Thil tha lo a thleng em?"
.
"In vannei hle mai. Tunah chuan thil pawi engmah a thleng lo. Mah se, enkawl uluk angai viau dawn anih hi. Ka pindan ah min lo zui lawk ta che." Ka nu chu kalsanin doctor chu ka zui a. Thil tha lo tak min hrilh ngei dawna ka hriat vangin ka zam ru hle.
.
"Naute hi a pai tlang thei ngei ang tih ka sawi chiang ngam lo va, amah khan naute paih a phal lo bur si a.." Doctor chu ka en tawp a ka chil ka lem khawlh bawk.
.
"A nunna atang a hlauhawm em?"
.
"Tlang takin ka sawi ange. A pai tlang chuan amah hian a tuar theihna chance a sang khawp mai." ka mit deuh sulh. Naute chu duh viau mah ila Muffin nunna in a tuar dawn ai chuan loh theih lohna vangin kan paih mai angai dawn anih chu.
.
"Amah  ka va hmu phawt a nge."
.
"A rilru va hneh ngei tum ang che."
.
.
Muffin chu beidawng zetin ka en a, a duhthlanna chu sut leh a tum hmel loh nasa.
.
.
KAR 38 HNUAH*
.
Dawhthei lo takin ka vei sek a, ka zam a ka awm hle hle thei lo. Hetiang dinhmun hlauhawma ding leh tur hian Muffin hian nau a pai tawh miah lo vang. Kan pahnih hian fa nei miah lo pawh ni ila kan dam dun chhung chuan ka lungawi reng zawk ang.
.
Naute tap ngak ngak ri ka hriat chuan ka ding chawt. Pindan kawngkhar chu kan en thap a, thawm an rawn nei zui har hle mai. A nghaktu tan chuan nghahhlelhawm tak a ni.
.
Nurse pakhat arawn chhuak a, kan lo din hual nghal tuau a ni ber.
.
"A nu a tha em?"
.
"Tha e, hlauhthawn tur a awm lo. Naute te pawh an tha e." theih ni se lawm lutuk vanga au chiam chiam mai ka duh hial.
.
A nunna in a tuar a hlauhawm a ni tih hre chung pawha naupai tlang ngei a tum thu  min hrilh ni khan ka thin a rim a, ka hlauthawng bawk a. Eng emaw chen kha chu mut pawh ka mu hleithei lo hial a nih kha. Engkim ah kan fimkhur em em a, naute phir a pai tih a inhriat ni a Muffin hlim ziate kha ka ngaihtuah let lo thei lo.
.
Tunah chuan hlauhawm zawng zawng pal tlangin naute kan nei ta. A pawimawh ber Muffin dinhmun pawh a tha anih chu.
.
"A hmuh theih tawh e." tih ri ka hriat rualin Muffin mutna pindan ah chuan ka lut nghal a, a hmel ka hmuh chuan engmah ka sawi thei lo. A bulah kal hnaiin ka kuah a, ka fawp vawng vawng a.
.
"Engkim a tha vek ang ka tih kha. Pathian hi kan chungah a tha tiraw?" a ti sep sep a. A mittui tla chu duat takin ka hru a, kei pawh chhungrila hlimna leh lawmna nasa tak vangin awm dan tur ber ka hre meuh lo.
.
"Vawikhatmah dinhmun hlauhawm ah i awm leh tawh lovang." ka ti ngawt a, tawng lovin min kuah nghet sauh a. Tawngkaa sawi ngai lovin kan ngaihtuahna kan inhriat sak ve ve.
.
.
.
"Vawiin ah kan chhungkaw hlimni min lo hmanpuitu zawng zawngte, in hun hlu tak senga min lo telpui avangin ka nupui nen lawmthu kan sawi e."
.
Muffin ka bula ding chu a kawngah kuahin ka lamah ka pawthnai a. "In zavaiin hun nuam tak in hmang theuh dawn nia." kut beng dar darin an kal darh a, Muffin chu la kuah reng chungin ka kalsawn pui a.
.
Vawiin hi kan fate piancham kum khatna a ni a, kan chhungkhat leh thian hnai zawng zawngte sawmin kan fate piancham kan lawm a ni. Hun hi a lo ral chak hle mai. Hmanni lawka piangte kha kum khat an lo tling ve ta reng a nia. Ka nu'n kan fapa pawmin ka u nupuiin a naupang zawk hmeichhe naupang a nu ang maia hmeltha chu a pawm bawk a, a hmu apiangin hmeltha an ti chu mak ka ti hran lo! Nu leh pa mitah chuan a tha ber anni reng a ni.
.
"Kan bo daih chuan mak an lo ti ange."
"Kan rei dawn hleinem."
.
Kan room ah lutin hun rei tak chhung ka lo dahthat reng tawh thil chu ka ipte atangin ka phawrh a. Ka thil ken a hmuh chuan mak tiin a thaw hak mai.
.
"Papa?" a ti that.
"Ka nun min tawmpui avang hian lawmthu ka hrilh nawn leh che. Ka hmangaih che. Chuan he thil hi ka pe let ang che."
.
A hmui petin a nui tat tat a.
"Chimawm suh aw.." Zak lo ang taka langin ka thil ken chu arawn phih thla a, "He thil hi.. Eleazer, i chak dawn lo lutuk.." hmeichhe inthuamna thehlep tak, keimah chauhin ka hmuhpui, kan mutdun hmasak ber tuma a hak ngei kha kengin a kalsawn a, a underwear dahna bawm hawngin a dah lut sawk sawk a.
.
"Engtin nge?" arawn inher leh chuan kan insu chiah..
.
"I va dah tha rei ve. Eng atan nge i tih vak a." ka awmah a kut pahnih nemin min rawn en chho a, thil dang ka sawi tawh lo. Ka nupui duhtak hmuiah chuan ka fawp vawng  vawng a. Kan inlakhran leh hnu chuan ka tukhum samah khawih  neuh neuhin ka mitah min en leh a.
.
"Ka hmangaih che." a ti sap a.
.
"Ka hmangaih., min hrilh nawn fo ang che."
.
Kan pindan atanga chhuakin inhnuai panin kan chhuk a, ka kutah  min rawn kaiin chiang zet hian kan inen a, a nui leh seih a. Ka nun hman mekah hian ka lungawi tawk e.
.
COPAS (HEARTS) ka post tantirh atanga a tawp thlenga min chhiar saktu zawng zawngte in chungah ka lawm em em e. Ka tum anga awm theih loh hun tam tak a awm tih min hriatpui a, dawhthei taka min nghah hram hram thin avang leh ka tan in awm reng thin avangin ka lawm em em bawk e. Ka tan mi pawimawh ber inni tih in inhriat kha. I love you all. Story thar JADE (Soddisfazione) nen ka lo let leh ang. Chumi hma chuan (Savdhan deuhin) lo hrisel ula, lo inveng fimkhur ula, kan dam anga kar lehah kan inhmu leh theuh dawn nia.
With lots of LOVE � Thantei Pautu LauraSean *_*